DE PANTON BANGKA PART 2

by: Ole

Men bemutor dek atei-atei

Numbur beteu muka tesurok

Men dek pacak ngelawan atei

Idup sara gelek temengok

Jen ke kebun men ujen nakne

De samber peter beden kek tejulak

Jen heran dengan bujang suat ne

Benyek yang dek renyek agik dengan miak

Men ade sisa maken jengen de buang

Bec de berik kek keben ayem bi

Men nek renyak, renyaklah kek gele urang

Jen nek nunggun urang betitel bi

Jen nua igek maken rambutan

Saket perot sara sendirik

Jen nua igek ngunar jabatan

Abis jabatan dek de pakai agik

Imang nyamen maken ketupat

Abis laok e bec kek de belei

Imang nyamen sepradik kek pejabat

Pinter dek pinter pacak begewei

Amang Ijal gei behume

Gei behume dengan bik Mila

Imanglah mudil budak suat ne

Masok kota sikit lah nek begaya

Mimanglah katak pandei begaya

Asak besuara gelek ramai bekawan

Mimanglah watak..watak manusia

Asak kesara baru tekeneng kek Tuhan

Mimang kesian utan suat ne

Utan ijeu lah mulai kelelep

Mimang kesian kita suat ne

De kiri asep de kanen asep

Mimanglah sara aek suat ne

Kena kemarau demene-mene

Mimanglah aneh idup de dunia ne

Benyek urang bemuka due

Anek ngah Kam budak kelakei

Duit e ilang de buek maling kabur

Jen tersinggung kek perucap kamei

Dekde maksod laen cuma nek ngibur

Malem jemat ade dedemit

Gei ke pantai pas arei sabtu

Yu........ kamei mohon pamit

Assalamualaikum warohmatullahi wabarokatu

:)