pantun Bangka

Panton Bengkek

(Sastra Nona Van Bangka)

By: Yuliarni

Bagi yang mece ne moga-moga terhibur ok

Ne panton bukan sembarang panton

Panton asli karya anek bengkek

Khilaf salah kamei mintak ampon

Moga terhibur bi ayuk, abang, adik, bik, mang, nek, akek.

Gei kepasar ngesaic kerang,

Tengah bejelen digigit kerengge,

Dek jedei menghina ras urang,

Sege ras dek jamin masok surge.

Siang-siang ngejer anek ayem,

Ayem e larei ke belekeng umah urang,

Jen gelek igek mandik malem-malem

Kalok penyaket segele tulang.

Atok Urip nek melei rukok,

Rukok dibelei beng tuko Abek.

Daripada ngumpol duit kek ngerukok,

Along besumbang kek amal baek.

Ukan lubang men dek dalem,

Tapi sareng keben kerengge,

Ukan alam e yang kejem,

Tapi urang e yang dek kawa nyage. 

Men dek kawa gawei ke uten,

Duit masok jadei musel,

Men serakah lah masok ke beden,

Tanah nek muyang abis de juel.

Lempah daret pucok idet,

Melei pelempah dengen mutor,

Urang Bengkek pandei beradet,

Bier idup jadei terator.

Amang Sukri melei knalpot,

Knalpot lama besek suara,

Men TI lah sekapot-kapot,

Alam ancok urang e sara. 

Mutek sang pakai suyak,

Mutek di kebun Kampong Bareu,

Kalok adet lah de lupak,

Banyek urang dek tertei maleu.

Dari Pusuk ke kampong Sekak,

Singgeh sedenget di Beruas,

Banggalah kek budaya ikak,

Darei budaya ade ciri khas.

Punduk di kebun ade tige,

Kebun e ade di Bukit Kuang,

Budaya asli patot dijage,

Sebelum ilang diambik urang. 

Jangen langok beramel harta,

Sebab semua ya dek muet rugei,

Jangen sumbong men banyek harta,

Sebab harta dek dibawek matei.

Melei aek langsung de bukek,

Kena aos lah dek ketara,

Salah satu ciri khas Bangkek,

Urang e rukun banyek budaya.

Pantai Matras de Sungailiat,

Pantai e begus aek e biru,

Men ade urang melarat,

Jengen de tengong beic de bentu.

Sungguh la jeuh kampong tuik,

Saking jeuh e belenje ge sara,

Kampong kamei kampong yang unik,

China kek Islam duduk besama.

Mutor di jalen ngebut gale,

Untong nasib dek betumbur,

Mimang nakne Bengkek suat ne,

Utan gundul danau belembur.

Melei rusep di kampong Mancong,

Rusep de cecel kek pucok ubei,

Jangen takot belakei urang kampong,

Urang kampong banyek bec urei.

Dari Mancong nek ke Kelapa,

Ke Kelapa melei boneka,

Men idup ngelawan urang tua,

Pas di akhirat masok neraka.

Jangen takot berumah tanggek,

Sebeb rezekei de ator Tuhan,

Jangen takot macel ke Bangkek,

Sebeb urang e pandei bekawan.

Idup di dunia Cuma sementara,

Sebab ya pebenyek la amal ibadah,

Keneng semboyan nek muyang kita,

Adet besendi syara’, syara’ besendi kitabullah.

Jelen-jelen ke kampong tuik,

Jengen lupak mutek kedebik,

Panton kamei cukup disinik,

Laen waktu de sambung agik.